რაც უფრო დიდხანს გრძელდება ძუძუთი კვება, მით უფრო ნაკლებია დედებში გულის დაავადებებისა და ინსულტის განვითარების რისკი, იტყობინება პიტსბურგის უნივერსიტეტის მკვლევართა ჯგუფი.
“გულის დაავადებები ქალთა სიკვდილიანობის ერთ-ერთი წამყვანი მიზეზია, ამიტომ სასიცოცხლო მნიშვნელობა აქვს იმის გაგებას, თუ რისი გაკეთება შეგვიძლია პროფილაქტიკის მიზნით” - აღნიშნავს მედიცინის, ეპიდემიოლოგიის, მეანობა-გინეკოლოგიისა და რეპროდუქციული მედიცინის ასისტენტ-პროფესორი ელეონორა ბიმლა შვარცი (Eleanor Bimla Schwarz). მისივე თქმით, დიდი ხანია იცოდნენ იმის შესახებ, რომ ძუძუთი კვება სასარგებლო იყო ბავშვებისთვის, ხოლო ეხლა კი ცნობილი გახდა, რომ იგი ასევე სასარგებლოა დედებისთვისაც.
კვლევის თანახმად, პოსტმენოპაუზურ პერიოდში მყოფი ქალებისთვის, თუ ისინი ბავშვს ძუძუს აწოვებდნენ სულ მცირე ერთი თვის მანძილზე, მცირდებოდა დიაბეტის, მაღალი არტერიული წნევის და ქოლესტერინის მაღალი შემცველობის განვითარების რისკი. იმ შემთხვევაში თუ ქალები ძუძუს აწოვებენ ერთ წელზე მეტი პერიოდის მანძილზე, გულის დაავადებებისა და ინსულტის განვითარების რისკი მცირდება 10%-ით.
დოქტორი შვარცისა და მისი კოლეგების თქმით, ძუძუთი კვებას ხანგრძლივი ეფექტი აქვს – საშუალოდ 35 წელი იყო გასული მას შემდეგ, რაც კვლევაში მონაწილე ქალები უკანასკნელად აწოვებდნენ ძუძუს.
კვლევა, რომელიც დაიწყო 1994 წელს, ემყარებოდა პოსტმენოპაუზურ პერიოდში მყოფი 139 681 ქალის მონაცემებს.

http://www.eurekalert.org

2009.04.22