მკვლევართა თქმით, ულტრაიისფერი სხივების გამოყენებით საავადმყოფოების პალატებსა და მოსაცდელ ოთახებში შესაძლებელია ტუბერკულოზის გავრცელების 70%-ით შემცირება.
იგი პოტენციურად ბევრი ადამიანის სიცოცხლეს გადაარჩენს გლობალურად და განსაკურებით კი იქ, სადაც ჰოსპიტალური პაციენტების თავმოყრას აქვს ადგილი.
ყოველწლიურად ტუბერკულოზი აინფიცირებს 10 მლნ-ზე მეტ ადამიანს და კლავს დაახლოებით 2 მლნ ადამიანს მთელ მსოფლიოში. ასევე, აღინიშნება წამალზე რეზისტენტული შტამების უფრო ფართოდ გავრცელება.
საერთაშორისო კვლევის შედეგები გამოქვეყნდა ჟურნალში PLoS Medicine.
ამჟამად მიმდინარეობს ულტრაიისფერი გამოსხივების ნათურების დამონტაჟება ლონდონის სენტ-მერის ჰოსპიტლის თორაკალურ განყოფილებაში.
”საავადმყოფოების მოსაცდელ ოთახებში ადამიანების თავმოყრის შემთხვევაში საკმარისია ერთი დახველება რამდენიმე მოწყვლადი პაციენტის დასაინფიცირებლად”- ამბობს დოქტორი როუდ ესკომბი (Rod Escombe) ლონდონის იმპერიალ-კოლეჯიდან.
როდესაც ტუბერკულოზის მქონე პაციენტი ახველებს, ბაქტერია ჰაერში ვრცელდება უწვრილესი წვეთების სახით, მოედება მთელ ოთახს და იწვევს სხვა პაციენტების, ვიზიტორებისა და სამედიცინო დაწესებულების შტატის დაინფიცირებას.
უკანასკნელმა კვლევამ აჩვენა, რომ ეს ბაქტერიები შეიძლება განადგურდეს მოკლეტალღოვანი ულტრაიისფერი გამოსხივების (UVC) ნათურის გამოყენებით.
UVC ნათურა კლავს ტუბერკულოზის ბაქტერიებს, მის წამალზე რეზისტენტულ შტამებსაც. დნმ-ის განადგურებით ბაქტერიები კარგავენ დაინფიცირების, ზრდისა და გაყოფის უნარს.
ეს ნათურა მაღალი ინტენსივობით უკვე გამოიყენება სასწრაფო დახმარების მანქანებისა და საოპერაციოების დეზინფექციისთვის.
ტუბერკულოზის საფრთხე განსაკუთრებით დიდია განვითარებად ქვეყნებში, სადაც შეიმჩნევა წამალზე რეზისტენტული შტამების გავრცელება და ამავე დროს, შეზღუდული რესურსები პაციენტის იზოლაციისთვის.
UVC ნათურა წარმოადგენს შედარებით იაფ საშუალებას დააავადების წინააღმდეგ საბრძოლველად. როგორც აღნიშნავენ, ტიპიური UVC ნათურის ფასია დაახლოებით 350 აშშ დოლარი.