11 თვის ბავშვი მენინგოკოქცემიის შედეგად განვითარებული ტოქსიკური შოკით თბილისის ინფექციური პათოლოგიების ცენტრში 28 ივლისს, შუადღისას, მიიყვანეს. ინფექციონისტ მარინა ეფრემიძის განმარტებით, დაავადებულს დედაქალაქში გადაყვანამდე რუსთავში მკურნალობდნენ: [მარინა ეფრემიძის ხმა] „მდგომარეობა მკვეთრად გაუარესდა. დღეს გამოეხატა კანზე სისხლჩაქცევები, რომლებიც განსაკუთრებით მრავლად არის სახის არეში და ეს დაავადების სიმძიმეზე მიუთითებს.“
დაავადების სიმძიმე არ გამორჩენიათ არც რუსთავის ბავშვთა ინფექციურ საავადმყოფოში, რომლის მთავარი ექიმი, ნატო თოფურია, ამბობს, რომ დაბალი სიცხეებით ბავშვი 21 ივლისიდან ავადმყოფობდა, თუმცა მშობლებმა საავადმყოფოში მისი მიყვანა მხოლოდ 28 ივლისს გადაწყვიტეს:
[ნატო თოფურიას ხმა] „გუშინ შემოიყვანეს 13 საათსა და 10 წუთზე. საათი და 40 წუთი დაყო ჩვენთან. 14 საათსა და 50 წუთზე გადავიყვანეთ თბილისში. მაღალი სიცხე 38,5, ძილიანობა და სხვა მენინგიალური ნიშნები ჰქონდა გამოხატული...“
მენინგიალურ ნიშნებში რუსთავის ბავშვთა ინფექციური საავადმყოფოს მთავარი ექიმი სისხლჩაქცევებს გულისხმობს, თუმცა, როგორც დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორი პაატა იმნაძე ამბობს, დაავადების გამოვლენა უფრო ადრეულ ეტაპზეცაა შესაძლებელი:
[პაატა იმნაძის ხმა] „მშობლებისთვის არის პირველი რეკომენდაცია, რომ თუ ბავშვს თავის ტკივილი და მაღალი ტემპერატურა აქვს, აუცილებლად უნდა მიმართოს ექიმს, ხოლო თუ მუცელზე ან კიდურებზე სისხლჩაქცევები აქვს, მაშინ ექიმს დაუყოვნებლივ უნდა მიმართოს.“(სტილი დაცულია)
პაატა იმნაძის თქმით, მენინგოკოქცემიის დროს ადამიანის სისხლი მენინგოკოკური მიკრობით იწამლება, რაც, მკურნალობის დაგვიანების შემთხვევაში, როგორც წესი, სავალალო შედეგით სრულდება. არადა, მედიკოსების განმარტებით, დაავადების გამომწვევი მენინგოკოკი გარემოში ნაკლებად გამძლეა და ის სადეზინფექციო ხსნარების ზემოქმედებით ადვილად იღუპება, თუმცა დაავადებათა კონტროლის ეროვნული ცენტრის ხელმძღვანელი იმასაც ამბობს, რომ დაავადების ძირითადი გადამტანი ადამიანის ორგანიზმია:
